近年網購巨頭Amazon積極開拓實體市場，繼書店、無人便利店及超市後，最近就宣布將於今年開設實體時裝店「Amazon Style」，嘗試透過科技解決排長龍等試身室、貨品雜亂等傳統時裝店常見問題。

Amazon Style將於今年下旬落戶洛杉磯格倫代爾市（Glendale），舖面佔地約3萬平方尺，將販賣男女裝衣服、鞋及配飾，售價由10美元到4,000美元不等，滿足唔同階層顧客需要。

有別於一般時裝店，Amazon Style每款衣物只會展出一件陳例品，客人可以透過專用App掃瞄貨品嘅QR Code查看尺寸、顏色、產品評價以及其他推薦款式等資訊。揀啱就可以喺App將貨品送到試身室或櫃檯直接結帳，當店員將已選好嘅貨品送到試身室後，就會透過App通知客人去試衫，從而避免大排長龍等試衫嘅情況出現。

除此之外，每個試身室都設有觸控螢幕，客人可以即時評價商品或要求試其他尺寸或另一款服飾，然後店員就會透過試身室內嘅特別衣櫃送貨，客人全程毋需大聲呼叫店員。