唔覺唔覺，今日原來已經係年27，正常黎講大家夜晚就可以去行年宵，但今年因為大家都知 (但好多人唔明) 嘅原因，唔好講年宵，連出街食團年飯都唔得。不過現實生活中嘅法例，於元宇宙世界就冇用嘅！所以有公司就推出香港首個「元宇宙年宵」，仲真係有嘢買、有Show睇添！

所謂元宇宙 (Metaverse)，其實就係一個虛擬嘅世界，大家可以粗略地理解成一個大型Online Game，而玩家們就可以用自己嘅虛擬分身 (Avatar) 於虛擬世界之內互動。元宇宙與普通VR或者Online Game嘅最大分別，在於佢與真實世界係有聯繫，就好似今日開幕至2月5日嘅「Mart in Metaverse」咁，唔單止係於虛擬世界中起一個年宵出黎畀大家行下咁簡單，入面真係有不同品牌、商鋪進駐，亦真係可以線上購物，線下收貨。

Mart in Metaverse主要分成三個主題展區，包括聯合香港遊戲製作YouTuber 「Kingsan景三」設計、以唐樓為藍本嘅「港式文化館」。入面就有公利真料竹蔗水聯乘西班牙手工糖果 PAPABUBBLE推出嘅全新手工涼茶棉花糖、CASPAR HOUSE推出嘅馬賽克及彩繪創作、正宗泰國古法風味的 INBAAN、英國最受歡迎脆豬皮品牌 Mr Porky以及意懷舊鐵製品牌鐵皮工作室等商店。

另外天台上亦有「Live @FTLife」舞台，將會聯同香港史上首個Hip-Hop音樂頒獎典禮「Whats Good Music Award」，邀請十多位本地歌手及DJ作元宇宙演出。

另一主題展館，就係有好大棵桃花喺屋頂嘅「花開富貴館」，入面主要就賣食物為主，當中包括由「Jacques n Gill」主廚 Jacques Kagi 祈積奇推出嘅即食瑞士清湯牛腩、巨龍盆菜、手工爆谷Powcook等。同一展館亦邀請到服務品牌FILA進駐，真係有衫賣。

最後一個「NFT藝術展覽館」，顧名思義就係展出NFT藝術品嘅地方。當中展出嘅包括Ian都有買嘅「Monkey Kingdom」、非常有新年氣氛嘅「香港財神NFT God of Wealth」等總值過百萬嘅NFT。其中「香港財神NFT God of Wealth」將於年宵期間，每日送出一個財神NFT (售價為 0.88 SOL)，只要運用創意回答問題就有機會得到。

NFT藝術展覽館

Monkey Kingdom

香港財神NFT God of Wealth

「MART IN METAVERSE 元宇宙年宵」活動詳情
日期： 2022 年 1 月 28 日至 2 月 5 日 （年廿六至年初五）
時間： 24/7
平台 Cryptovoxels
入場費用： 免費
官方網站： https://martinmetaverse.io/