疫情期間，唔少返Office工嘅Gentlemen應該都有試過遙距工作 (Remote Work)，但某啲工作嘅本質，就係冇辦法遙距工作嘅，例如便利店員工，好明顯就係要返到便利店先可以工作。不過近日日本有公司就招聘緊「VR駕駛員」，實際上就係透過VR操控機械人於便利店中工作！換言之，不久嘅將來，可能連便利店工作都可以遙距工作啦！。

VRでロボットを遠隔操作いただくオペレーターも募集しております。開発経験などITの経験は必要ありません。#アルバイト #パート #アルバイト募集 pic.twitter.com/MYikTYYMUV

— Telexistence (@telexistenceinc) May 24, 2022

日本機械人公司「Telexistence」過去幾年都與日本Family Mart合作，研究能夠代替真人於便利店中工作嘅機械人，以彌補日本人力資源短缺嘅問題，去年佢哋就成功研發出以VR遠程操控，專門負責為飲品櫃執貨嘅機械人「Gordon」，近日更於Twitter登出招聘啟事，聘請VR操作員去操作「Gordon」執貨。據啟事列明，呢位VR操作員唔需要有任何IT知識，只需要有VR操作經驗就得。人工方面日更及夜更時薪1,450Yen (約HK$90)，通宵更1,800Yen (約HK$110)，每更九個鐘，每週包含週末工作4日。換言之通宵更返足，月薪大約係HK$16,000左右。

但值得一提嘅係，雖然獲聘者唔使親身去到便利店，但相信係因為目前操作技術所限，所以係要去Telexistence嘅東京辦公室工作。或者要再等多一段時間，先能係真正Work From Home？