對唔少人而言，音樂係生活嘅必需品，所以都會買隻靚嘅喇叭喺屋企——要注意呢個嘅「靚」唔係單指靚聲，而係個樣都要靚，畢竟喇叭已經唔再只係「播歌裝置」，更係一件家中擺設。而以推出各種結他、結他音箱而聞名嘅Fender，早前就推出旗下藍芽喇叭Indio嘅第二代，相信能夠滿足大家嘅需求啦。

Fender Audio Indio 2為事隔4年推出嘅同系列第二代，繼續以Fender嘅結他Amp「Fender Mustang」為外型藍本，分為黑色嘅「Tolex」及啡黃色嘅「Tweed」兩個版本，二者最大分別係顏色、外層物料及面網設計，而且都係由工匠人手裱裝。箱體用上同級產品少見嘅天然木材，再配上矽膠⼿把、扭掣及紅寶⽯電源燈，外型充滿復古美感，當擺設咁放都可以提升屋企個氣質。

而音質方面，Indio 2採用4單元設計，一對3.5吋低音單元再加一對0.63吋高音單元，總輸出由上代40W提升到60W，而且內置電池可以連續播放25小時，無論係於屋企聽歌，定係去海灘、露營時製造氣氛都綽綽有餘。音色則係Fender一貫嘅澎湃、實淨、剛強。連接方面，除藍芽5.0之外，仲有3.5mm接口，方便連接不同裝置，機背亦有USB插口，必要時可以用佢黎做「尿袋」為手機充電。同時Indio 2新增Duo Mode功能，亦即如果你有兩隻Indio 2，只需撳一個掣就可以無線配對成雙聲道。