睇完Apple發布會，大家有冇諗住買iPhone 14呢？不過遠在地球另一邊嘅巴西居民就可能想買都買唔到喇...

據《路透社》報導，Apple自iPhone 12開始以環保為由唔再附送叉電器，更引起其他Android品牌效法。不過巴西當局就唔接受呢套說法，認為冇證據證明唔送叉電器能夠保護環境，反而覺得唔跟叉電器嘅電話係唔完整嘅產品，對消費者不公，所以日前下令禁止Apple於當地出售不含叉電器嘅iPhone，並處以1227.5萬巴西雷亞爾（約1,840萬港幣）罰款，換言之現時嘅iPhone 12、iPhone 13、iPhone SE以及新出嘅iPhone 14均不能出售。Apple揚言會提出上訴。

至於另一邊廂嘅Samsung，亦試過同樣原因而被巴西政府罰錢，所以最新推出嘅Galaxy Z Fold 4及Galaxy Z Flip 4就重新加入叉電器（僅限巴西售銷版），滿足當地規定。暫時未知Apple iPhone 14會否採用相同做法。