Apple今年秋年發布會隆重推出Apple Watch Ultra，搭載鈦金屬錶殼及藍寶石水晶玻璃錶面，號稱歷來最堅固、最強大嘅Apple Watch，滿足一眾熱愛上山下海嘅運動好手。有見及此，最近有外國YouTuber就實測一下隻錶究竟有幾「堅」，點知用鎚仔扑到張木枱都爛埋，隻錶都未爛！

以測試產品耐久性聞名嘅科技YouTuber「TechRax」，日前上傳一段名為《Apple Watch Ultra鎚仔及摔落測試》嘅短片。起初TechRax先以錶面朝下嘅方式，將Apple Watch Ultra從4英尺(1.2米)高墜落，結果錶面並冇碎裂，功能完全正常，只係錶殼有少少刮花。隨後佢將手錶放入充滿螺絲及鐵釘嘅膠樽搖晃，亦未見任何明顯傷痕。

最後就係戲肉部份，TechRax直接拎出鎚仔，對準放喺枱面嘅Apple Watch Ultra瘋狂敲打，結果喺螢幕碎裂之前，木枱已被敲出一個凹洞，大約敲到第10下左右手錶先至冇晒畫面、並且無法開機，不過螢幕依然未有裂開，敲到第15下先將螢幕敲碎。

由此可見，Apple Watch Ultra確實非常堅固，有興趣買嚟做運動嘅朋友不妨參考一下