如果大家有留意國際新聞，應該會留意到美、中雙方近日先後於領空中發現不明飛行物 (UFO)，其中美國軍方更多次出動戰鬥機將UFO擊落，並證實其中一個UFO係來自中國嘅間諜氣球。問題係其他嗰啲係咩呢？美國軍方發言人就對傳媒表示：「不排除來自外星。」

2月4日發現並擊落，確認來自中國嘅氣球

美國近日接連於領空發現UFO，先係2月4日美國軍方於加州海岸擊落一個「間諜氣球」，及後美、中雙方都證實個波係來自中國 (但中國話係科研氣球)；隨後又於2月10、11及12日發現並擊落三個UFO。據美國傳媒引述軍方知情人士指出，後三個UFO不論大小、形狀、飛行高度都各不相同，其中2月10日於阿拉斯卡發現嘅UFO「有架小型汽車咁大」，而2月11日從阿拉斯加飄入加拿大西北部嘅就「細好多，而且係圓柱體」。而2月11日於多倫多附近擊落嗰個就係「八角型結構再有啲繩，但冇明顯嘅載重」

圖片：電影《Independence Day》

而後三個就係問題所在，因為據美國空軍將軍Glen VanHerck日前對傳媒表示，軍方到目前為止都唔知嗰幾個UFO實際上係咩黎，亦唔知佢哋係點樣浮喺半空。佢仲特別提到，「我哋會叫佢哋做『物體』而唔係『氣球』係有原因嘅。」同時佢亦拒絕排除呢幾個UFO係來自地球以外，表示一切都要等情報部門分析過之後先有結論。

資料來源：Sky News