黃子華話齋：香港人精神，就係冇精神。事實上「唔夠瞓」並唔係香港人嘅專利，唔少已發展國家，特別係亞洲國家嘅打工仔，都面對住日日唔夠瞓嘅困境。以為咗解決呢個都市問題，日本有廠商就推出「立睡」膠囊，利用最少嘅佔地為都市人提供「瞌一瞌」嘅空間。

所謂嘅「立睡」，並唔係「立即睡著」，而係「站立睡眠」。卻說來自北海道嘅「広葉樹合板株式会社」近來推出一個由北海道大學以及台灣國立大學聯合研發、名為「giraffenap」(因為野外嘅長頸鹿係企喺到瞓覺) 嘅睡眠膠囊。giraffenap高約2.5米，佔地1.2米 x 1.2米，大約同一個電話亭差唔多，佔地亦僅為2/3張單人床嘅大小。方便於空間有限嘅地方，例如咖啡店、車站甚至辦公室內放置。

而由於佔地所限，使用者冇可能正常地「瞓」，所以膠囊內設有頭部、臀部、膝部以及腳板嘅可調整支撐結構，使用者下身用一個半跪半踎嘅姿勢放鬆，上身就同趴喺台面瞓覺一樣。同時giraffenap亦有兩個款式，分別為科技感較重、私隱性較高嘅「SPACIA」，以及更能融入日常環境、有個木製外殼嘅「FOREST」。

「広葉樹合板株式会社」引述經濟合作暨發展組織 (OECD)嘅數據，表示日本人每日平均睡眠時間僅為7小時22分，為組織內30個國家中最少 (30國平均睡眠時間為8小時24分)。而據日本厚生勞動省嘅數據，有超過67%日本每日睡眠時間不足7小時，表示大部日本人都有睡眠不足嘅問題。同時佢哋亦引述NASA研究，指日間只需要瞌26分鐘，就可以提升34%注意力、16%反應時間，以及回復疲勞、增加創意等好處。

目前giraffenap會於日本原宿嘅NESCAFE店內進行試運，825Yen可以用30分鐘加一杯咖啡。

資料來源：g-nap.com