{ SKIP }
文:MenClub 魏文青  
POSTED ON 14 Aug 2023

自從六月Elon Musk於「X」上聲稱要同Mark Zuckerberg進行「籠中格鬥」,而Zuckerberg又火速應戰之後,大家都非常期待呢兩位億萬富豪嘅肉搏戰,但睇黎大家最期待嘅畫面未必會出現。事關Mark Zuckerberg昨日於Threads發文,批評Elon Musk對事情唔認真,一直都唔肯定出上台日子,所以佢決定「Move on」去做其他嘢。


自從Elon Musk挑機、Zuckerberg應戰後,二人都分別於自家社交平台多次更新相關消息。其中Elon Musk先暗示比賽會於羅馬競技場進行;8月6日時Elon Musk又話「X」上會有直播,所有收入將會捐予美國退伍軍人慈善團體;但到8月7日時佢又話自己可能要做頸部同背部手術,所以比賽日期仍然未定。反正目前都仲停留喺「得個講字」嘅階段。

而Mark Zuckerberg似乎就對Elon Musk嘅態度相當不滿。佢先於週六時喺Threads上發文,表示自己由Elon Musk挑機嗰日起就已經準備好上台,但對方就係唔畀出確實日子。更提醒網民「喺日子定好之前,麻煩大家都當佢講嘅嘢係未經雙方同意」。

而到美國時間週日晚,佢就再次發文表示:「我諗大家都會同意Elon唔認真。我提出過確實日子、Dana White (UFC主席)提出可以幫手搞正式嘅慈善比賽,但Elon就係唔肯確認日子,又話要做手術,又話要黎我屋企後花園打練習賽。如果佢之後真係想認真打嘅話,佢知道點搵我;如果唔係,我就係時候專心去同認真對待呢項運動嘅人比賽。」

Elon Musk隨後就於X (Twitter) 上貼出與Zuckerberg嘅訊息對話。可見Elon Musk的確提出要去Zuckerberg後花園 (佢有私家八角籠) 打練習賽,而Zuckerberg就回覆:「如果你真係想認認真真打場MMA,就應該自己去Train,準備好就黎話我知。我唔想再期待啲唔會發生嘅嘢,所以你係想打就快啲打,唔係就由佢啦!」

而Elon Musk就回覆:「我星期一會喺Palo Alto (Zuckerberg屋企),我哋去你個八角籠到打啦」、「除咗今日同Lex Fridman (科技界名人,巴西柔術愛好者,一個月前曾經同Zuckerberg練習過) 練過下,我冇咩練習過架咋。以我哋嘅體形差異,雖然我覺得冇咩可能,但話唔定你係現代李小龍,唔知點解贏到呢!」

反正到目前為止,都係未知呢兩位富豪之間嘅比賽會否上演。

《Candy Crush》近年雖已失去當年嘅熱度,但多得一班忠實玩家(例如唔少人嘅阿媽)支持,整體營運情況仍非常良好。不過近日就有指遊戲開發商「King」近日於母公司Microsoft令下解僱200名員工,而最諷刺嘅係該批員工 ...
tech
【電玩】《Candy Crush》用AI取代真人開發遊戲 200名員工被親自研發的AI取代
17 Jul 2025
SONY嘅全片幅隨身機RX1R系列睽違10年終於迎來新作!RX1R III延續系列一貫輕巧便攜設計、配備ZEISS Sonnar T* 35mm F2定焦鏡頭,同時喺像素、對焦性能同影像處理上全面升級,帶來前所未有嘅拍攝體驗。呢部旗艦級隨身 ...
tech
【十年磨一劍】SONY全片幅隨身機RX1R III震撼登場!搭載6100萬像素感光元件及AI處理單元
16 Jul 2025