被稱為「PS5 Slim」嘅薄版PS5主機預計本月正式上市，但日前有國外店家疑似偷跑開賣，多張實機照片因而曝光。

據外媒《The Verge》報導，一位名為「BrΔndon」嘅網民日前於X上貼出多張新舊PS5實物對比照（該貼文已刪除），可見到新版PS5設計更為緊湊，比舊版足足細咗成個碼，符合官方所講嘅體積縮小約30%以上，更適合屋企空間有限嘅玩家。除此之外，BrΔndon亦發現新機如同傳聞一樣，當首次使用光碟機時，需要連上網絡先能夠將光碟機註冊到PS5使用，唔少玩家就擔心若然Sony日後關閉有關驗證伺服器，光碟就可能無法使用。

新版PS5同樣分為「光碟版」及「數位版」兩款型號，售價為499.99美元（光碟版）及449.99美元（數位版），預計11月內於美國率先開賣，但具體日期尚未公布。