Apple於iOS 17.3嘅開發者版本中，加入一個名為「遭竊裝置防護 (Stolen Device Protection)」嘅新功能，利用GPS位置、生物特徵掃瞄以及時間差等多個方法，令賊人即使偷到你部iPhone、知道埋你解鎖密碼，都無法重設整部裝置。唔單止令你更有機會搵返部電話，而且更令賊人「銷贓」嘅難度及成本大大增加。

由於一部恢復原廠設定嘅iPhone，於二手市場嘅價值遠超一部被密碼鎖住嘅「磚機」，所以唔少賊人於偷機之前，都會先偷窺用戶嘅手機解鎖密碼，電話到手之後就立即解鎖，並重設Apple ID密碼、關掉「Find My」功能，設定一個新嘅「復原密鑰 (Recovery Key)」，然後再將手機重置成出廠設定以方便出售。

而啟動咗「遭竊裝置防護」之後，只要手機偵測到離開屋企或工作地點等常用地區，就必須使用Face ID或Touch ID先可以解鎖。而如果要更改Apple ID密碼的話，系統會先要求用戶掃瞄Face ID或Touch ID，然後強制要求等一個小時，一個小時後再掃多次Face ID或Touch ID先可以真係改密碼。目的係減慢賊人更改密碼嘅時間，為用戶爭取時間尋回iPhone。

同樣地，開啟「遭竊裝置防護」後，如果要增加或更改「復原密鑰」，又或「信任的電話號碼」，同樣需要經過「先掃Face ID或Touch ID、等一個鐘、再掃多次」嘅流程。而平時儲存大家各種密碼嘅「iCloud 鑰匙圈」，於「遭竊裝置防護」開啟後亦只能用Face ID或Touch ID先可以解鎖，確保他人無法使用你儲存於手機上嘅各種密碼。

「遭竊裝置防護」將隨iOS 17.3推出，考慮到日前Apple開放iOS 17.3嘅開發者版本，估計數個星期內就會推出正式版iOS 17.3。

資料來源：mrmad、engadget