Asus日前於CES 2024上發佈旗下電競手機ROG Phone嘅最新系列「ROG Phone 8」。當中除咗大家都估到嘅「更快、更輕」之外，最有趣嘅或者就係電話將加入AI功能，但個AI主要都係幫大家打機用嘅——定位相位明確。

Asus於CES2024上一口氣發佈ROG Phone 8、8 Pro及8 Pro Edition。三部機嘅硬件規格一模一樣，都係Snapdragon 8 Gen 3處理器，5,500mAh電池，65W快叉，配一塊6.78吋、165Hz、高峰亮度達2,500nits嘅OLED螢幕。鏡頭方面有32MP前鏡頭，後方則係50MP主鏡頭、13MP廣角加32MP三倍變焦長焦鏡嘅組合。另外比起ROG Phone 7，ROG Phone 8薄咗少少（10.49mm變8.9mm）、輕咗少少（239g變225g），同由IP54防塵防水升級成IP68。

三款ROG Phone 8嘅主要分別，就係內存、記憶體同價錢。賣1,099.99美金嘅Phone 8係12GB（Ram）+256GB（內存）；1,199.99美金嘅Phone 8 Pro係16GB+512GB，而賣1499.99美金嘅8 Pro Edition就係24GB+1TB。

Asus亦指ROG Phone 8中會加入AI功能，例如AI能夠自動閱讀遊戲畫面嘅文字，方便玩家上網搵特定任務攻略。另外AI亦會協助玩家搜尋手機內嘅圖片等資訊。另外仲有個「AI壁紙」功能，簡單黎講即係內置「Stable Diffusion」，等玩家可以自行生成想要嘅手機壁紙。

打機方面，Asus指ROG Phone 8嘅散熱效能比上代高20%。另外著名嘅「外置散熱」AeroActive Cooler亦有改進，今代最高可以為手機降溫26度。