近年「政治正確」成風，不論商業廣告、影視作品又或電玩遊戲，於創作時亦需要考慮到內容嘅「政確性」。不過，部份過於刻意嘅「政確」內就令消費者產生反感，甚至有人發起抵制行動。好似近日Steam平台上就出現一個名為「Sweet Baby Inc Detected」嘅遊戲「不推薦名單」，其目的就係為咗針對被稱為「政確推手」嘅「Sweet Baby Inc.」。

Sweet Baby Inc曾參與開發嘅遊戲

圖片：Sweet Baby Inc

首先你一定會問，究竟咩係「Sweet Baby Inc.」？據其官網介紹，Sweet Baby Inc. 係一間成立於2018年、位於加拿大蒙特里爾嘅「敘事開發和諮詢工作室」，其使命及目的係「講述更好、更具同理心的故事，同時使電玩產業多樣化和豐富」以及「讓遊戲對每個人來說都更有吸引力、更有趣、更有意義、更包容。」簡單黎講，就即係一間協助遊戲開發商，令遊戲更「政確」嘅第三方公司。

不過有玩家認為，「Sweet Baby Inc.」沾手過嘅遊戲，都會出現「矯枉過正」嘅傾向。除咗遊戲內會出現「LGBTQ」、「BLM」等政確元素外，亦會刻意醜化白人男性、削弱女性角色外觀吸引力。而且「Sweet Baby Inc.」對遊戲開發嘅發言權極大，好可能會因為「政確性」問題要求開發公司更改甚至刪減故事、角色、美術風格。換言之整個遊戲都可能為滿足「政確性」而偏離開發者原意。

「Sweet Baby Inc Detected」事件後，唔少網民都搵返部份「Sweet Baby Inc.」參與過嘅遊戲中嘅「政確元素」出黎批評。圖為未發售嘅《Fable》重製版中，女（？）主角與真人演員嘅對比圖

另外，Sweet Baby Inc有份參與嘅PS5遊戲《Spider-Man 2》，亦曾因女角外表而引起熱議。下圖為2018年發售嘅第一集《Spider-Man》中Mary Jane嘅真人演員及遊戲角色。

下圖右則為去年發售嘅《Spider-Man 2》中嘅Mary Jane。圖左為遊戲開發商Insomniac Games嘅員工，部份網民認為新版Mary Jane係用咗佢個樣

而二月底時出現於Steam上嘅「Sweet Baby Inc Detected」遊戲名單，其實就係由有13年資歷嘅Steam鑑賞家「Kabrutus」整理、Sweet Baby Inc. 曾經參與過關發嘅遊戲名單。「Kabrutus」為名單上所有遊戲都打上「不推薦」評語，並列出Sweet Baby Inc.嘅參與證據。名單初時曾一度出現《Starfield》、《Horizon》等大作，不過後來因為「目前證據不足」而被移除。目前名單上較為知名嘅作品則有《Assasins Creed: Valhalla》、曾因小丑女變「大醜女」而引起討論嘅《Suicide Sqaud: Kill the Justice League》等。而PS5 遊戲《Spider-Man 2》，以及重製版《Fable》就因為未登上Steam或未發售而無法被列入名單。

更值得一提嘅係，其實「Sweet Baby Inc Detected」名單於發佈初期時冇咩人知，直到Sweet Baby Inc.嘅敘事設計師兼作家 Chris Kindred、顧問 Maya Felix Kramer 等人於X（Twitter）上發文指責名單歧視，並呼籲大眾將名單甚至「Kabrutus」整個Steam帳戶「Report the fuck out」，先令名單開始引起大眾注意。而除住事件曝光度上升，多位Sweet Baby Inc.員工亦已刪文，而「Sweet Baby Inc Detected」名單嘅追蹤人數，亦已暴增至18萬人。