唔少人出國旅行都會選擇使用Airbnb租屋，以獲得更地道、私隱性更高嘅住宿環境。不過近年就不停發生Airbnb住客於房間內發現隱藏鏡頭嘅事件，結果Airbnb日前宣佈更改政策，完全禁止房東於室內放置任何監視鏡頭。室外鏡頭以及分貝計等亦必須要於房間資料中寫明，否則房東嘅整個帳戶將會被封鎖。

過往只要係位於客廳、走廊、前門等「公共空間」，而且清晰可見，以及有於房間資料中寫明，Airbnb係容許房東於室內安裝監視鏡頭。不過，近年多次發生房客發現隱藏鏡頭事件，甚至令部份房客每次入住都要先掃瞄室內有否鏡頭先敢入住，故此Airbnb改例，直接禁止房東於室內安裝任何鏡頭。萬一被房客發現室內鏡頭並作出投訴，Airbnb將會介入調查，並有可能移除該房源或房東整個帳戶。

Airbnb雖然仍准許房東於室外安裝鏡頭，但就明文表示鏡頭不可以對准室內，如室外浴池、桑拿等「私隱度較高」位置亦禁止安裝，而且房東必須於房間資料中寫明室外鏡頭嘅位置。另外，為防房客用間屋舉行派對，唔少房東都會於房間內安裝分貝計。Airbnb曾於2022年禁止安裝分貝計，但最新版本政策就表示房東必須表明是否有安裝分貝計，似乎就係向房東提供返些少保障。

Airbnb新政策將於4月30日實行。房東必須於此日前移除所有室內鏡頭。

資料來源：The Verge