Elon Musk旗下創科公司Neuralink日前在X進行直播，展示首名人腦晶片植入者Noland Arbaugh目前康復情況良好，並能透過念力捉棋及遊玩電腦遊戲。

現年29歲嘅Noland Arbaugh表示，自己8年前因一次潛水意外導致肩膀以下全部癱瘓，今年1月接受Neuralink晶片植入手術後，翌日已經可以出院，整個過程十分輕鬆。不過，術後都需要做一啲訓練以便控制鼠標，並形容使用Neuralink就好似《星球大戰》嘅「原力」，只要望住螢幕上某個地方，鼠標就可以移動到佢想要嘅位置。

在片中，Noland Arbaugh示範如何移動游標暫停音樂播放器以及遊玩國際象棋，並表示Neuralink令佢可以重拾已經放棄多年嘅《文明帝國VI》，而且一玩就連續玩咗8個鐘，言談間可以感到佢非常滿意及興奮。美中不足嘅係，Neuralink續航力只有8小時，用完就要充電，不過佢就未有透露充電方式。