Apple預計會於六月舉行嘅WWDC中公佈全新嘅iOS 18，而近來關於iOS 18嘅傳聞亦越來越多，例如《Bloomberg》嘅著名記者Mark Gurman就表示Apple可能會為Siri等功能加入「能夠幫助處理日常生活」嘅人工智能。近日佢又再爆料指，iOS或會容許用家「更自由」地安排主畫面佈局。

用過iOS又或iPadOS都知，Apple素來都拒絕讓用家自由安排主畫面上不同App、App群組又或Widget嘅擺位，用家只能安照Apple定好嘅「網格」擺放，而且必須按照「左至右、上至下」嘅方式排列，中間不能留下任何空格或空行。雖然目前可以用第三方程式等方法解決，但傳聞中iOS 18就終於放寬限制，令用家可以「更自由」地安排主畫面。

不過，呢個所謂「更自由」，其實都唔係咁自由架咋。傳聞指iOS 18仍然保留主畫面上嘅「網格」，只係正式容許用家於App與App之間留下空格或空行，簡單黎講即係冇咗「自動向左上對齊」嘅限制，叫做好過冇。不過傳聞亦指今次只係Apple放寬對主畫面限制嘅第一步，未來或會有更多、更大嘅改動。

資料來源：MacRumors