社交平台已經成為大家生活密不可分嘅一環，但素來「玩Social Media」就真係得個「玩」字，係唔會帶來直接收入。不過Meta近日就宣佈會於Threads上推出「獎金計劃」，以及吸引創作者留喺Threads並持續創作有吸引力嘅內容。據目前消息指，獎金可以高達$5000美金。

據《Engadget》報導，Instagram上嘅「Instagram獎金」頁面中，近日多咗個新到連官方都未翻譯做中文嘅「Threads Bonus Program」欄目，當中寫到Threads Bonus只會向受邀創作者開放，獲邀請嘅創作者會於Instagram收到通知可以參與計劃。欄目亦寫明Threads Bonus目前處於測試階段，計算方法分為「你的Threads帖文表現」以及「你創作的帖文數目。例如你可能要發佈一定數量的帖文，然後每個帖文有獎金」兩種，似乎亦暗示每個受邀創作者嘅獎金額及計算方法都會唔同。有Threads創作者貼出邀請訊息截圖，當中顯示佢嘅Threads帖文有超過一萬次觀看就開始有錢收，最高可獲$5,000美元。

來源：@mattnavarra on Threads

來源：Instagram

其實近年社交平台都開始向創作者推出類似計劃，一方面留住有質素嘅創作者，另一方亦係靠佢哋推動平台發展。例如X早前就推出一個分成計劃，與「藍剔」用家分享其帖文下嘅廣告收入；Meta自己亦曾為咗推廣Reels而推出相關獎金。

資料來源：Engadget