Dyson去年推出兼具空氣清新機及主動降嘈耳機兩大功能嘅「Dyson Zone」，不過橫睇掂睇「Dyson Zone」都係Dyson為咗踏足耳機領域而推出嘅實驗性產品。而近日Dyson就宣佈推出「純」降噪耳機「Dyson OnTrac」，單睇規格基本上就係冇咗空氣清新功能嘅「Dyson Zone」，都可以話係「圖窮匕現」啦。

根據Dyson發佈嘅新聞稿，Dyson OnTrac配有「先進降噪功能」，能夠「每秒監測周邊噪音達384,000 次」、「消除高達 40dB的噪音」、「透過 MyDyson™ App 實時監控和顯示環境噪音」。另外亦有「寬廣音頻範圍」，40mm、16ohm嘅「釹合金喇叭驅動器」及「先進的音頻訊號處理技術」，能夠「呈現由6Hz至21,000Hz的寬廣音頻範圍、由深沉低音至清晰高音的細膩音色」。

點解上面我要用引號？事關上述Dyson OnTrac嘅所有功能，都同去年Dyson Zone嘅耳機部份一模一樣。事實上除咗每次充滿電後可以使用主動降噪時聽歌55小時，比起Dyson Zone長咗5個小時之外，Dyson OnTrac嘅絕大部份功能規格都同拎走咗空氣清新功能嘅Dyson Zone一模一樣。

另一個主要分別就在於外貌。Dyson OnTrac冇空氣清新功能，自然就唔需要有濾網，所以整體外型比Dyson Zone小巧，顏色方面亦有CNC 亮銀色、亮銅色、黑鋼色，以及採用陶瓷質感噴漆表面處理嘅陶瓷硃砂色。同時Dyson亦為Dyson OnTrac推出多款不同顏色嘅耳墊，據報總共有超過2,000種顏色組合。

售價方面，Dyson OnTrac嘅美國售價為$499美金，比起Dyson Zone嘅基本版平$200美金。唔知你又會唔會心動呢？

資料來源：Dyson