隨住Netflix日前於2024年第二季業績報告指出，於英國及加拿大試行嘅「有廣告版月費計畫」成功後，Netflix正式將計畫推展到其他地區。據報美國及法國嘅Netflix使用者近日都收到通知，表示本來最平嘅「基本」方案將會被取消，使用者將需升級至「標準」或「高級」兩個更貴嘅無廣告方案，或者選擇更平、但有廣告嘅「Standard with ads」新計畫。

據Netflix官方網站中嘅收費及計畫列表，美國及法國地區已跟隨英國及加拿大，取消本來最平（$11.99美金）、支援720p清晰度嘅「基本」方案，如果用家仲想享有免廣告計畫，就必須選擇更貴、支援全高清及超高清播放嘅「標準」（$15.49）或「高級」（$22.99）計劃。另一邊廂，佢哋亦推出有廣告嘅「Standard with ads」，月費每月只需5.99美金，但用戶就需要觀看廣告。同時Netflix官網亦寫明「Standard with ads」用戶將不能觀看部份內容，據報係因為部份內容嘅授權問題。

Netflix於5月時宣佈各個方案加價，當時香港地區嘅「基本」方案由$63加到$73、「標準」由$78加到$88，而「高級」則由$93加到$108。目前Neflix未有公佈何時會於美國、法國、英國及加拿大以外地方，推出「Standard with ads」計畫以取代「基本」計畫。但相信唔會隔太久。各位香港用家要做足心理準備啦。

資料來源：GSMArena、Netflix