近年歐洲職業足球聯賽都引入各種「影像輔助裁判」，亦即所謂「VAR」黎協助球證作出「更準確」嘅判斷。但個結果嘛…睇波嘅你心中有數，唔睇波嘅你可以去問下身邊有睇波嘅朋友，反正就係一言難盡。不過技術呢家嘢係可以改進嘅！據外媒報導，即將開季嘅英超將使用新技術協助球證判斷越位，而最特別嘅係，呢個新系統竟然係用iPhone。

據《Wired》報導，英超將於新球季（24-25球季）引入一套由Genius Sports及其子公司Second Spectrum研發嘅新輔助裁判技術。與以往嘅VAR只係為球證提供多幾個觀看角度、慢鏡重播，而且過程費時又容易出現人為錯誤不同，新技術將會用上最少28部安裝於球場四週、多角度捕捉球場嘅iPhone 14或以上型號手機，以其內置鏡頭再配合特製軟件「Dragon」追蹤球場上所有人嘅位置及精細動作，再建構出一個反映球場即時活動嘅3D球場，並即時判斷球員是否越位——例如準確決定傳球瞬間，以及接應球員及防守球員該刻嘅相對位置及動作——換言之唔需要球證透過睇螢幕劃線黎定斷，相信能夠大大增加球證判決嘅準確性。

Genius Sports亦提到，該技術已經於NBA開始使用，國際足協亦曾於2022年世界盃使用呢套系統嘅早期版本。系統亦加入機械學習（Machine Learning）功能，能夠「理解」場上發生緊咩事。之餘點解要用iPhone，主要因為系統對鏡頭嘅質素及運算能力有一定要求，而iPhone就已經係目前最合適嘅選擇。

資料來源：Wired