隨住生成式AI逐漸成熟，唔少企業都於各個層面使用生成式AI製作文字、圖像或影像內容，不過顧客、觀眾接唔接受又係另一回事。好似日本麥當勞早前就於官方X（Twitter）發佈咗一條用上AI美少女嘅宣傳影片，結果就被日本網民群起批評，唔少人都話條片入面啲人「噁心」、「睇到都冇胃口」。

AI♡ポテト#月曜からポテトML250円#AIラブポテト

※タップしてご覧ください pic.twitter.com/WFOUmHeJ0c

— マクドナルド (@McDonaldsJapan) August 17, 2024

卻說日本麥當勞8月17日時於官方X上發佈咗一條由AI創作者「Kaku Drop 架空飴」製作嘅AI宣傳片。片中以輕快音樂搭配多位AI美女、於多個同樣係AI生成嘅背景中拎住麥當勞薯條出現。縱然影片吸引到超過1200萬次觀看，但睇返留言，就會發現大部份日本網民都係批評緊條片。有人表示睇到條片就覺得唔開胃，有人狠批條片「質素其差」，有人話睇完條片就覺得「人間美好」，反正就係冇一句好說話。

圖片：Kaku Drop 架空飴

日本「桜美林大学」企業管理學系准教授「西山守」隨後於「東洋經濟」撰文，整理出網民對條片嘅不滿主要有4點：「批評條片唔自然」、「恐怖谷效應（人造物越黎越似人，你會覺得越黎越可愛，但到某個位太似人但又唔係人，你就會覺得恐怖）」、「對於AI本身有嫌惡」以及「認為AI爭奪人類嘅工作」。西山教授特別點出，麥當勞並非第一間使用生成式AI製作宣傳物料嘅日企，但其他公司嘅作品一係真到分唔出係AI（例如伊藤園及Sharp），一係明顯地睇得出AI（如オタ恋），偏偏麥當勞呢條片就處於兩者之間，所以先會引起大量批評。

值得一提嘅係，條片嘅創作者「Kaku Drop 架空飴」於其社交平台上經常上傳AI生成美女圖，但下方嘅留言幾乎係一面倒嘅激讚。今次條片出事，好可能係麥當勞以及創作者本身都冇預計過。

資料來源：東洋經濟