隨住氮化鎵（GaN）技術越黎越成熟，市面上嘅叉電插頭唔單止Watt數越黎越勁，體積亦越黎越細。近日中國著名充電器及週邊品牌Anker就推出功率達100W嘅全新Nano 充電插頭，唔單止比起品牌目前嘅100W充電插頭更小更輕，甚至能夠媲美AirPods Pro2嘅充電盒。

同品牌目前有嘅Prime 100W充電頭比，新嘅Nano 100W充電頭長闊厚都細咗一個圈，特別係厚度由39mm縮減到29mm，令整體體積減小26%，重量亦由183g減到120g，可謂非常輕便。官網上更指Nano 100W充電頭比Airpods Pro 2充電盒更「短」及更「矮」，但由於較厚，所以實際上體積都係比Airpods Pro 2充電盒稍大。

另外充電頭嘅「腳」亦加上防滑物料，減少拉動充電線時成個插頭移位嘅機會。

由細又能夠做100W充電，當然有代價。Nano 100W充電頭上僅有一個USB Type C充電頭，對於想同時為多個裝置充電嘅人黎講可能有些少麻煩。另外上述嘅體積計算係用緊可以摺疊嘅扁平兩腳插版本，跟據港版Prime 100W嘅經驗，相信Nano 100W都會推出可摺疊嘅三腳插版本，但受三腳插嘅設計所限，應該冇辦法維持四四方方嘅造型啦。

不過預購價44.99美金，即係HK$350左右再送一條6尺C-to-C充電線，又的確係幾吸引，難怪到撰文之時就已經賣哂。各位可能要等香港正式引入先買得到啦。

資料來源：Anker