近日韓國爆出大型「DeepFake」事件，只有不法份子利用「Deepfake」技術將女明星、偶像以至普通女生嘅外貌合成指成人影片中並出售謀利。事件再一次令人警覺AI技術越趨成熟後產生嘅新社會問題。而YouTube上週亦宣佈會推出新工具，供創作者及知名人士偵測自己嘅聲音外貌是否被AI合成至其他作品之中，以進一步保護大眾安全。

據YouTube於上週發佈嘅官方部落格文章，目前YouTube正在製作兩個新工具。第一個係「合成歌聲分辦技術」，供創作者「偵測及管理含有模擬佢哋歌聲嘅YouTube影片。YouTube指目前佢哋正與合作夥伴調整新工具，預計明年初就會正式推出。另外YouTube亦建立緊一個外貌偵測系統，將「容許來自各行各業嘅人，包括創作者、演員、音樂人、運動員，偵測及管理出現他們樣貌，以AI技術製作嘅YouTube影片。」簡單黎講，就即係創作者或知名人士將有辦法阻止其他人利用AI技術製作含有佢哋歌聲或樣貌嘅影片並發佈到YouTube之上。

同一篇文章亦強調YouTube雖然會使用平台上嘅影片「為創作者及觀眾改善產品使用體驗」，但亦強調會「負責任地」使用。另外文章亦明確表示第三方單位利用YouTube影片訓練AI係「違反我們的使用條款，亦破壞我們為換取創作者作品而提供的價值」，但考慮到AI環境不停進化，某啲創作者可能自願同第三方單位合作，所以未來會向創作者提供更多選擇，並於今年稍後時間會有進一步公告。

資料來源：YouTube