對於大部份玩家黎講，「買Game」嘅意思理應係「我自此擁有呢隻Game，想幾時玩都可以」。但近日著名PC遊戲平台Steam就更改其購買頁面上嘅銷售字眼，強調玩家畀錢買到嘅只係「在 Steam 上該產品的授權」，簡單黎講即係「玩呢隻Game嘅權利」，而非真正「擁有呢隻Game」。

以往當絕大部份遊戲都係單人遊戲、而且所有玩家都（只能）買實體卡帶或光碟時，玩家的確係有遊戲嘅「擁有權」，亦即只要部機同隻Game本身冇故障，買咗返黎之後幾時玩、玩幾耐全憑玩家自己決定。但後來當多人連線遊戲或模式出現，玩家必須通過官方營運嘅伺服器與其他玩家連線，亦即玩家能否遊玩遊戲中嘅（部份）內容係取決於官方如何經營伺服器。喺呢個角度下，玩家嘅擁有權其實已經部份被「遊玩權」所取代。

不過過去廠商即使停運伺服器，通常都會容許玩家保留單機遊戲嘅內容。例如今年初Sony宣佈《Gran Turismo Sport》停服，但玩家仍然能保留車庫內所有車，亦可以於離線模式下繼續玩。另一啲遊戲雖然未必有類似安排（或根本冇單機遊戲嘅部份），但玩家亦可以利用遊戲本體進入私人搭建嘅「私服」遊玩。再加上絕大部份玩家即使面對心愛遊戲關服，大多都選擇換Game玩，所以一直未有大問題出現。

據外媒推測，Steam今次更改字眼，好可能為咗配合九月時發佈，將於明年生效嘅美加州「AB 2426」州法。AB 2426要求出售銷售數位內容時，若非「賦予無限制的擁有權，或附帶有時限的租用選項」，則不得使用「買（Buy）」、「購買（Purchase）」等字眼作宣傳。而之所以會有AB 2426呢，又要講到大家嘅「好朋友」Ubisoft。

話說Ubisoft於今年3月時終止咗雖然於2018年已經咗出咗續集，但仍然有好多人玩緊嘅開放世界多人線上賽車遊戲《The Crew》嘅伺服器營運。而且即使隻Game有好多可以繼續單機遊玩嘅內容，但由於Ubisoft要求要連上官方伺服器先可以玩，停服就代表連單機內容都玩唔到。更甚嘅係停服幾日後，玩家發現再次點開《The Crew》時會出現「你不再有此遊戲的授權」，遊戲亦自動被移到玩家遊戲庫中嘅「已停用」欄位。《The Crew》引發嘅爭議，被視為加州推出AB 2426嘅觸法點之一。

資料來源：Engadget