多名供應鏈人士爆料，Apple自今年夏季初就開始大幅削減Vision Pro產量，現有版本或於年底前正式停產，將重點轉投開發較平價嘅入門機種。

Apple於今年2月推出嘅首款混合實境(MR)頭戴裝置Vision Pro，因為價格高達3,500美元加上冇咩App，一直有傳銷情疲弱。最近外媒《The Information》引述多位零件供應商人士透露，目前供應商已生產了50-60萬部Vision Pro組件，足以滿足市場需求，有部分工廠更早在5月因應Apple預測而停止生產零件，倉庫中更堆滿數萬件尚未交付嘅組件。

據報，近日Apple已通知組裝工廠「立訊精密」，可能會在11月起停產Vision Pro。現時立訊精密每天生產約1,000部Vision Pro，產量係高峰時期嘅一半。但由於生產線尚未拆除，若然銷情好轉，Apple仍然可以恢復生產Vision Pro。

另一方面，Apple已停止開發第二代Vision Pro至少一年，並將重點轉投開發較便宜嘅低階入門級型號（即平價版Vision Pro），目標在2025年底前推出。值得一提嘅係，Apple已告知供應商準備生產400萬部平價版Vision Pro，數量只係Vision Pro嘅一半，反映Apple對頭戴裝置嘅態度已變得保守。