各位Apple用家第時如果唔見咗電話、耳機或具備AirTag嘅物品，都可以透過呢個功能搵其他人甚至航空公司，協助尋回失物。

若然大家係Apple產品用家，而且又試過唔見電話、手錶、耳機等等嘅話，相信都對「Find My」功能唔會陌生，簡單嚟講就係一個追蹤裝置定位嘅功能，從而方便尋回失物。最近Apple就喺iOS 18.2測試版中，為「Find My」新增一項全新功能「Share Item Location(分享物品位置)」，讓用家能夠生成一個可以顯示失物位置嘅連結(link)，再分享畀信得過既人或航空公司職員，以協助尋回失物，而且就算唔係使用Apple設備，亦都開到呢條連結。

為保障用家隱私與安全，當失物被尋回或分享超過7日後，連結就會自動失效，而用家亦可以隨時終止其位置分享。Apple表示，目前已經有15間航空公司表示會支援該服務，以幫助旅客尋回行李，預計未來幾個月正式推行，當中包括新加坡航空、聯合航空、澳洲航空、加拿大航空、荷蘭皇家航空等等。

另外，航空運輸技術先驅SITA亦表示旗下嘅WorldTracer行李追蹤系統將整合「Share Item Location」功能；WorldTracer係全球逾500間航空公司及2,800個機場使用嘅行李追蹤系統。