依家嘅AI可以模仿真人聲線、甚至能夠生成一個幾可亂真嘅假人，唔少人都擔心AI會被詐騙集團利用黎作案。不過「水能覆舟，亦能載舟」，AI除咗用黎詐騙人之外，仲可以用黎反詐騙。好似英國電訊公司O2早前就整咗個叫Daisy嘅「AI婆婆」，其唯一目的就係浪費騙徒嘅時間。

顧名思義，Daisy就係一個扮演緊老婆婆、識得出聲講嘢嘅AI聊天機器人，並會搭配一組（或多組）電話號碼。由於電話唔會公開，亦唔會用於其他地方，所以唯一接到電話嘅機會，就係詐騙集團嘅隨機電話。而只要接到詐騙電話，呀Daisy就會不停拉住電話入面嘅騙徒傾計，講下自己有咩興趣呀，講下自己隻貓呀咁。重點在於Daisy一方面能夠有如真人一樣回應騙徒，甚至「嘗試」跟隨騙徒嘅指示「被騙」，但一方面佢又唔會真係被騙、亦冇嘢可以被人呃到，反正就係不停浪費騙徒嘅時間，等佢冇辦法去呃其他人。從O2公開嘅通話紀錄，甚至能夠聽到騙徒被Daisy激到破口大罵，真係大快人心架！

而且你唔好以為呢個只係惡作劇級嘅反擊。試想像如果Daisy或者其他類似技術能夠大規模推廣，咁詐騙集團用隨機電話呃人嘅時間成本就會大幅上升，甚至有可能到達一個「唔值得做」嘅地步，就能夠從源頭減少詐騙電話。比起咩電話實名制有用得多啦！

資料來源：O2