據《彭博社》報導，Sony正在研發一款可以直接遊玩PS5遊戲嘅手提遊戲機，但目前十劃都未有一撇，距離正式上市仲要一段時間。

彭博社引述消息指，Sony嘅構思係基於自去年推出嘅手持遊戲裝置「PlayStation Portal」。該裝置雖然具有手提機外觀，搭載8吋1080P LCD螢幕及DualSense手掣所有按鍵及功能，但只能夠透過Wi-Fi串流遊玩已安裝於PS5嘅遊戲，本身並不能獨立運行遊戲。

PS Portal起初不被看好，但正式上市後卻引起搶購潮。

而Sony嘅新計劃，就係製作一款能夠直接遊玩PS5遊戲嘅手提遊戲機，藉此擴大PlayStation玩家社群，挑戰由任天堂Switch所主導嘅手提遊戲機市場，不過仍處於早期開發階段，消息人士預計呢款新機可能要數年時間先推出市面，甚至有機會直接胎死腹中。

有傳Microsoft正製作Xbox手提機。（概念圖）

除此之外，早前亦有傳Xbox製造商Microsoft打算製作手提遊戲機，而Switch後繼機則會在明年4月前問世，唔知未來有冇廠商可以打破任天堂主導手提機市場嘅局面呢？