網絡上嘅資訊越黎越多、亦越黎越碎片化，無論係為咗節省時間定只係想儘快趕上話題，唔少人睇片時都會選擇倍速播放。但一般而言，大家都認為倍速播放會影響觀眾理解影片嘅能力，甚至有不尊重創作者之嫌。而近日日本就有個研究，發現即使將影片增加至1.75倍速播放，其實唔會對觀眾理解影片嘅能力有任何影響。而更驚人嘅係，呢個研究係由一位日本女高中生完成。

話說現時就讀高中三年級嘅神奈川縣平塚江南高中學生「植野緒深」，早前於日本全球性嘅「超級科學高中學生研究發表會」上，發表咗有關影片播放速度及理解能力嘅研究。佢指出於高中二年級時見到身邊好多同學都會以倍速觀看教材影片，所以產生研究「最有效學習方法」嘅念頭。

「植野緒深」先搵黎80名高中二年級生，將佢哋分成「正常速度」到「兩倍速」共5組，並要求佢哋睇完一條正常長兩分鐘嘅影片，再回答一系與影片有關嘅問題，以測試佢哋對影片嘅理解。結果發現，與事前「播放速度越快，理解程度越差」嘅假說不同，只有「兩倍速」組別嘅成績有所下滑，換言之即使用1.75倍速觀看影片，都唔會對理解影片產生任何負面效果。再換言之就即係用1.75倍速播放，的確能夠於不影響內容理解嘅前題下節省時間。

「植野緒深」仲做咗第二個實驗，以測試影片有字幕與否對理解程度嘅影響。結果不出意外地發現觀看有字幕版本嘅學生，對影片內容嘅理解程度明顯較高。兩個測試總結，就係觀看一條1.75倍速播放、而且有字幕嘅影片，係最有效率嘅學習方法。

當然，實際上每條片嘅說話速度、重點密度均有不同，所以「1.75倍速」並非放之四海皆準。研究意義在於證實倍速播放影片對理解能力嘅影響冇大家想像中咁大，所以適當地加快播放速度，其實係無傷大雅。

資料來源：koukouseishinbun.jp