AI發展一日千里，其重要性亦不斷提升，好可能會對人類生活嘅方方面面產生重大影響。不過近日有「AI教父」之稱嘅Geoffrey Hinton就再次警告，AI將係人類存亡嘅最大威脅，更將「30年內AI導致人類滅亡」嘅機率從10%，上調至「10至20%」，並揚言人類於AI面前只係一個三歲小朋友，毫無保護自己嘅能力。

卻說於2018年憑深度學習與人工神經網絡領域研究者獲得「圖靈獎」，被稱為「AI教父」嘅Geoffrey Hinton，一直都對於AI飛速發展抱有警戒態度，並多次呼籲要限制AI發展。去年11月於佢更於X上指出，根據貝氏推論法則，佢認為「如果AI沒有被嚴格管制而導致人類於未來30年內滅亡」嘅機率為0.1（即10%）。

而當Geoffrey Hinton接受英國BBC Radio 4電台訪問，被問到最近有否修正上述機率之時，佢先係回答：「其實冇，都係10至20%」，此時節目另一嘉賓指出：「你咁樣係調高咗喎」，對此Geoffrey Hinton回答：「我哋從來未試過要面對比我哋更有智慧嘅事物。你講得出幾多個例子，係低智慧事物反過來控制高智慧事物？係有幾個嘅，例如母親與嬰兒，但呢個係漫長地進化而成，而我都諗唔到第二個啦」、「我會咁樣諗：試想像下你同一個三歲細路，（面對AI）我哋先係個三歲細路。」

Geoffrey Hinton

圖片：Wikicommon

Geoffrey Hinton自2013年起就為Google開發深度學習及人工智慧相關技術，但佢於去年5月宣佈離職，以方便更公開地批評「不受管制的AI發展」。

佢於BBC Radio 4嘅訪問亦指出，目前AI發展嘅速度遠比佢想像中快：「依家係行內大部份專家，都認為於20年之內，我哋就會開發出比人類更聰明嘅AI。而你諗真啲其實係好得人驚」、「我嘅擔憂係，『無形之手』（即市場自行調節）唔會保護到大家嘅安全。單靠利益為上嘅大企業不足確保AI會安全地發展，唯有政府管制先可以強逼大企業安全地進行研究。」

值得一提嘅係，當年同Geoffrey Hinton一齊獲得圖靈獎、目前為Meta首席AI科學家嘅另一學者Yann LeCun，就對AI發展非常樂觀。不僅Geoffrey Hinton於首次指出「10%」時指出「Yann嘅估計係0.01（1%)」，Yann本人回覆時亦指「AI導致人類滅亡」嘅機率遠低於其他原因，甚至指出「AI可以拯救人類免於滅亡」。

資料來源：Guardian