任天堂老早就公佈會於今年推出「Switch」嘅後繼機（以下稱為Switch 2），早前更有業內報告指出任天堂有望成為未來數年主機市場嘅最大贏家。咁究竟「Switch 2」嘅機能如何？又會唔會為各位玩家帶來新嘅遊戲體驗呢？日前外國討論區上嘅一張疑似Switch 2主機板流出照，就或者可以為大家提供答案。

卻說一位名為「MHN 1994」嘅用戶，日前於外國著名討論區《Reddit》上發佈咗數張聲稱係「Switch 2 Motherboard」嘅照片，而其他網民對比更早前嘅其他流出圖之後，認為可信性非常高。從圖中我哋可以見到一塊刻有「NVIDIA」字樣嘅SoC（集成晶片，即係CPU加GPU），Reddit網民指出實際應為NVIDIA Tegra T239，總共有1536個統一計算架構（CUDA），比起目前Switch使用嘅Tegra X1僅有256個大幅提升6倍，換言之運算能力應有明顯上升。

另外亦見到一粒來自SK Hynix，型號為H58GE6AK8B嘅記憶體，對照網上資料後得知容量為6GB，速度為 LPDDR5X-8533，總數應該有兩粒即共12GB，比起目前Switch嘅4GB LPDDR4，不論容量定速度都有提升。

雖然Switch 2嘅機能比起Switch有大幅提升，但大家唔好唔記得單論性能而言，目前嘅Switch係被PS5及Xbox Series X/S拋離九條街，換言之Switch 2「大幅提升」過後，其實都只係「重回起跑線」。日前亦有消息指出即使配埋充電座，Switch 2最高亦只能輸出4K 30fps畫面，比起PS5 Pro聲稱「穩定4K 60fps」仍有段距離。但又咁講呀，任天堂幾時靠過畫面質素黎贏得玩家嘅喜愛呀？有趣嘅玩法及創意先係最大賣點呀嘛！

資料來源：Reddit