Lenovo於日前嘅CES 2025中，宣佈為其手提遊戲機Lenovo Legion Go增添一系列新成員，當中最搶眼嘅就要數到Legion Go S，事關除咗硬體比起其他手提遊戲機更為優秀之外，Legion Go S亦係首部支援Steam OS嘅非SteamDeck手提遊戲機。

比起早前推出嘅Legion Go，Legion Go S放棄咗可拆卸控制器及後方支架，螢幕亦由8.8吋（2,560 x 1,600，144Hz）縮細為8吋（1,920 x 1,200，可變更新率VRR），但換來較輕嘅重量（約860g vs 725g）以及較實淨嘅握感。運算能力方面，最高規格用上 AMD Ryzen Z2 Go整合處理器、32GB Ram、1TB SSD及55.5Wh電池容量，特別係記憶體容量方面比起目前市面上嘅大部份手提機嘅原生規格都稍勝一籌。

而代價就係730美元嘅定價，比起最高規格，用上OLED嘅SteamDeck都要稍貴。但要留意嘅係雙方於螢幕大小、解象度等均有差異，所以唔能夠單單比較價錢。

Legion Go S嘅另一搶眼之處，在於佢提供使用Steam OS嘅版本可供選擇（只有黑色機身），亦係第一個可以使用Steam OS嘅第三方廠商手提遊戲機。據外媒測試後表示，Legion Go S上嘅Steam OS，同SteamDeck上嘅Steam OS基本上完全一樣，只係多咗啲RGB燈、調高處理器用電量等設定，換言之使用體驗上應該同Steam OS一樣順滑。

而另一個選擇，當然就係Windows 11（只有白色機身）。事實上預期本月稍後時間正式有售嘅Legion Go S，一開始亦只會提供最高規格配Windows 11嘅版本，如果想要平啲（但規格稍遜）又或者Steam OS版本，就可能要等到5月先有。不過兩個OS於價錢上亦有差別，據報Steam OS版本最平499美金有交易，而Windows 11版本就要599美金。

資料來源：LENOVO