Nvidia最新「50系列」顯示卡「RTX 5080」及「RTX 5090」近日終於開售，並因為玩家及AI界別一齊哄搶而導致一卡難求，原售1,999美金嘅RTX 5090更一度炒上9,000美金天價。而近日美國eBay上就出現大量銷售「假卡」嘅「詐騙Post」，不過佢嘅目的就唔係為咗呃人，而係打算呃炒家設置嘅「掃貨機器人」，以對抗炒風。

大家搶過演唱會飛的話，應該都知呢個世界有樣嘢叫「Bot」，簡單黎講就即係一個可以不斷自動搜尋目標貨品，而且極速自動落單嘅程式。而相信外國玩家們就係認為有人用同類程式不停搶購網絡上出現嘅所有RTX 5090，於是就出「詐騙Post」阻礙其效率。例如其中一個Post於產品描述上就寫明「歡迎Bots及黃牛，如果你係真人就唔好買，你只要收到一張裱起咗嘅5090照片，你唔會收到5090顯示卡」，而且仲好貼心咁列出張相嘅大細，以及個框係喺Target（外國十蚊店）買嘅，最後再次強調「係．真．人．嘅．話．唔．好．買」。

而另一個Post亦同樣寫明「只有照片，不是真貨」，並同樣於產品描述中強調只係一張相。

圖片：eBay

雖然有玩家想盡辦法對抗黃牛，但據分析指出RTX 5090（以及5080）嘅價格於短期內應該都唔會大幅下跌。原因在於Nvidia嘅最大競爭者AMD推出嘅RX9070系列於性能上亦遜於50系列、早年再次進入顯示卡市場嘅Intel又再落後幾個身位，同時Nvidia似乎亦冇辦法（或者冇想法）增加50系列嘅產能，所以大家一係就等，一係就或多或少都要食炒價啦。

資料來源：IGN