大家上個星期應該有睇到新聞，指歐洲太空總署（ESA）正在觀察一粒名為「2024 YR4」嘅小行星，指佢有機會於2032年12月22日撞上地球。而近日ESA就再次公佈新研究數據，並將2024 YR4撞上地球嘅機率調高近一倍——但大家唔使擔心，據ESA嘅公告，機率提高其實係同佢哋嘅計算方法有關，所以大家不需驚慌，可以繼續返工！

據上月尾時ESA發出嘅公告，佢哋當時估計2024 YR4嘅直徑為40至100米，並有1.2%嘅機率直接撞落地球。ESA亦指出相似大小嘅隕石大約每幾千年就會撞落黎一次，並會對墜下地區造成嚴重破壞，所以2024 YR4就立即跳升成風險清單上嘅榜首，並會持續觀察其動向以及收集更多數據，以得出更準確嘅軌道預測及撞擊機率。

而事隔約一個星期，ESA於上週末又發表新報告，將2024 YR4嘅大小修正為40至90米，比起之前嘅估計略小；可能嘅撞擊日期維持於2032年12月22日不變，不過撞擊機率就提高到2.2%。雖然仍然係一個非常低嘅機率，但短短一個星期機率就跳升一倍，係咪代表事情好嚴重？

2024 YR4與地球最近距離嘅計算。Y軸單位係月球距離（約38.4萬公里）。灰線係地球位置，藍點係2024 YR4嘅位置。

圖片：ESA

或者係ESA都估到大家對於撞擊機率嘅高低好敏感，所以佢哋於最新公告中亦略為解釋咗「撞擊機率」嘅計算方法。簡單而言，目前人類只能計算小行星大致嘅前進路徑範圍，亦即所謂嘅「風險走廊」（Risk Corridor），而非確實嘅一條「線」，而當地球出現於「風險走廊」之內，就叫做有撞擊機率。隨住小行星前進，其「風險走廊」會不斷收窄，但同時亦代表地球「佔據」嘅範圍越黎越多，撞擊機率就會上升。直到「風險走廊」收窄到將地球排除在外，機率先會變零。

而根據ESA公佈嘅目前計算，2024 YR4真係會同地球擦身而過，兩者最近時不足一個「月球距離」，即約38.4萬公里。換言之未來一段時間內，大家應該會見到個機率不停上升。

資料來源：ESA