Apple繼昨日更新iPad產品線後，傳咗好耐嘅M4版MacBook Air亦在今日正式登場。雖然外觀上並冇變化，但就換上運算效能更強大嘅M4晶片，並加入「天藍色」取代原有嘅「太空灰」，而且售價仲上代便宜HK$1,000。

隨住MacBook Pro、iMac和Mac mini等產品在去年10月已升級至M4晶片，Apple喺今日亦為MacBook Air帶嚟一次小升級。全新MacBook Air外觀上基本同前代一樣，提供13吋及15吋兩種尺寸可選，除咗「銀色」、「星光色」、「午夜色」三種經典配色，今次就加入「天藍色」取代以往嘅「太空灰」。

硬件規格方面，搭載M4晶片嘅MacBook Air擁有更強大嘅運算能力及電池續航力，官方宣稱整體速度相比M1版本快達2倍，電池使用時間更長達18小時。除此之外，更換上全新1200萬像素Center Stage相機，大大提升影片質素之餘，並支援「人物置中」功能，即使喺鏡頭面前走嚟走去，用家個樣都會永遠保持喺畫面中間，以提升視像通話體驗。

MacBook Air售價分別HK$7,999（13吋）及HK$9,499（15吋）起，即日起開放訂購，3月12日正式發售。