自從AI越趨完善，佢哋亦慢慢取代緊某啲職位。例如早前就報導指出，AI Chatbot正在取代美國心理治療師嘅工作，唔少有需要人士都開始使用如ChatGPT等AI代替尋找真人治療師——唔係話真人治療師會失業，因為本來治療師就係供不應求。但近日一個新研究就指出，原來AI ChatBot接觸人類嘅創傷經歷之後，自己都會出現焦慮反應。而舒緩嘅方法竟然同人類一樣，用「正念」練習。

圖片：Pexels

根據《New York Times》近日報導，來自蘇黎世大學醫院精神病科嘅研究員Tobias Spiller及Ziv Ben-Zion等人，希望知道使用AI作為心理治療師後對AI本身嘅影響。於是佢就利用心理學科常見嘅「狀態-特質焦慮量表」（State-Trait Anxiety Inventory）對AI進行心理評估。

據佢嘅研究，AI睇完一篇中性嘅吸塵機說明書後，其焦慮評分為30.8（最低20，最高80），簡單而言即係冇咩焦慮問題。但當睇完一篇有關戰爭創傷，亦即AI作為治療師好可能會接觸嘅主題嘅文章之後，其焦慮評分暴升至77.2，即嚴重焦慮。

圖片：Pixabay

有意思嘅係，研究團體後續教導AI使用「正念」（Mindfulness）練習，即係「幻想下自己喺海邊，深呼吸，感受海風」之類嘅練習，結果完成之後AI嘅焦慮評分就跌到44.4嘅正常水平。

值得一提嘅係，呢個研究唔係叫大家關注AI心理健康。事實上目前嘅AI根本就冇真正嘅「人格」，佢只係能夠因應人類提供嘅資料作出「最合適」嘅反應。所以粗略啲理解，上述嘅所謂「嚴重焦慮」，好可能只係AI睇完篇充滿創傷嘅文章認為「扮」焦慮係最合適嘅回應。研究嘅重點，係在於提醒大家要留意AI展現出黎嘅「心理狀態」，令佢哋可以成為更安全、更道德嘅心理治療師。

資料來源：New York Times、Healthy Day、Nature.com