吉田修平認為，Switch 2過度強調硬件效能提升，而非創造出全新遊玩體驗，任天堂正失去其品牌特色。

過去幾十年，任天堂一直致力創造全新遊玩體驗，而非單純追求硬件升級。例如DS系列引入雙螢幕設計，其中下方螢幕仲要係觸控式，為玩家帶嚟更多玩法；而Wii系列就成功帶動體感遊戲風潮，令人唔再局限透過控制十字鍵或蘑菇掣打機。不過，任天堂對Switch 2似乎採取相對保守嘅態度，除咗Joy-Con可以當成滑鼠及加入GameChat功能之外，最大賣點就係硬件升級。

Special guest Shuhei Yoshida gets real about the Switch 2 pic.twitter.com/CzZYPnTtue

— Easy Allies (@EasyAllies) April 14, 2025

對此，前PlayStation工作室總裁吉田修平日前接受《Easy Allies》訪問時就表示，任天堂對Switch 2單純提升硬件嘅做法，可能會失去其品牌特色：「某程度上，我覺得任天堂正在失去緊佢哋嘅特色，呢個係我嘅睇法。佢哋一直致力於創新，將硬件同遊戲設計結合，創造出驚人全新體驗。但Switch 2就一如大家所料，係一部更強大嘅Switch。有更大嘅螢幕、更強嘅處理器、更高嘅解像度、支援4k及120fps…甚至搵嚟負責硬體開發嘅人主持直播，令人感覺Switch 2嘅核心理念就係『我哋將所有嘢都升級咗』呢樣唔係任天堂嘅風格，反而係其他主機平台一直做緊嘅嘢。」

吉田修平亦提到，對於只用任天堂平台打機嘅玩家嚟講，Switch 2確實係部好機，因為佢哋可以玩到之前玩唔到嘅遊戲，例如《ELDEN RING》。但對於擁有多個平台嘅狂熱機迷嚟講，Switch 2就略為欠缺新鮮感同吸引力。

不過平心而論，任天堂都唔係每代主機都有革命性改變，更多時候係從原有系統提升效能及追加新功能，例如Game Boy進化成Game Boy Advance(GBA)，NDS升級為3DS。再者Switch 2呢個命名，本身就暗示緊呢部機只係Switch系列嘅第二代，所以唔能夠強求任天堂會帶嚟初代Switch問世嗰種震撼，或者全新玩法與機身設計。唔知大家又覺得Switch 2係咪已經足夠創新呢？