Ubisoft目前因為停運《The Crew》伺服器、疑似損害玩家嘅權益而被告上法院。而正所謂禍不單行，近日Ubisoft又因為被指違反歐盟嘅「一般資料保護規則」（GDPR）而再次被告，更有可能面臨「去年營業額4%」、即係大約9200萬歐元（約HK8.14億）嘅鉅額罰款。

今次嘅原告係來自奧地利嘅非營利隱私維權組織「NOYB」。據外媒《Eurogamer》報導，早前有一位《Far Cry Primal》玩家對於Ubisoft規定玩家單機遊玩時仍須連接網絡先可以遊玩感到不滿，認為Ubisoft此舉係收集咗大量不必要嘅訊息。Ubisoft曾表示只會收集玩家啟動遊戲時間、遊玩時長等基本數據，但NOYB則發現遊戲於10分鐘與伺服器連接達150次，已超出「正常」嘅範疇。

同一時間，該名玩家亦對於要使用Ubisoft Connect帳戶登入先可以進行單機遊玩感到不滿。Ubisoft表示此舉係為咗驗證玩家嘅擁有權，但NYOB就指出該名玩家係透過Steam平台遊玩，相關嘅驗證理應可以透過Steam完成，毋需另外登入Ubisoft Connect。

Ubisoft曾於該名玩家向佢哋提出異議時指出，玩家接受使用者協議（End User License Agreement）即「同意 Ubisoft 使用「第三方分析工具來收集有關您和其他用戶的遊戲習慣和使用產品的資訊」；而玩家接受私隱權政策，即同意Ubisoft收集「遊戲」、「登入及瀏覽」等資料。

但NYOB則反駁指出，「玩家遊玩遊戲」呢個動作唔代表佢哋接受上述協議或政策，同時亦指出Ubisoft收集嘅係「無合法被處理」嘅「個人資訊」。

據GDPR列明，企業一旦被裁定違反相關法規，將面臨公司全球收益4%或兩千萬歐元（擇高者）的高額罰款。

資料來源：Eurogamer