任天堂全新遊戲主機Nintendo Switch 2自6月5日正式開賣後，在全球掀起搶購熱潮，唔少地方都出現大排長龍嘅畫面。據官方最新公布嘅統計數字，Switch 2上市短短4日全球銷量已突破350萬部，創下任天堂歷代主機首4日最高銷售紀錄，遠超初代Switch及其他舊款主機表現！

Switch 2之所以有咁亮眼嘅成績，除咗係機迷多年來對新主機嘅熱切期待，而Switch 2本身亦充滿誠意，搭載更大嘅螢幕、更強勁嘅圖像處理器，並配備支援滑鼠功能嘅全新Joy-Con 2手掣，為玩家帶嚟全新遊戲體驗。按照目前嘅銷售速度﹐Switch 2好大機會能夠達到任天堂早前定下嘅1,500萬部銷售目標（截至2026年3月底），如果下半年有大作突然推出，話唔定仲可以超額完成！

翻查資料，初代Switch喺2017年開賣首個月賣出大約274萬部，而Switch 2只用4日就達到350萬部，銷售速度真係快到似火箭！作為比較，PS4開賣6周後賣出420萬部，PS5開賣7周後賣出440萬部，Switch 2好大機會輕鬆超越呢兩代PS主機嘅紀錄。