對於企業黎講，使用AI黎取代真人似乎有兩個好處：AI嘅工作水平及效率比起真人高，同時使用AI嘅成本比請個人返黎更低。所以唔少人都預期AI終有一日會佔據社會中大部份工作位置，換言之好多人都會無工可以返。不過近日外媒《The Register》就指出，至少於目前黎講，用AI黎取代人力似乎係件唔可能嘅事，因為上面提到嘅兩個AI好處，其實都係假象黎。

《The Register》引述程式設計領域問答網站《Stack Overflow》進行嘅2025年開發者調查，指出雖然有84%程式設計師正在、又或有意使用AI輔助工作；但同一時間，用緊嘅AI嘅人當中，有46%都唔相信AI產出嘅成果。原因係佢哋用完AI後嘅除錯時間，比起佢哋自己由頭整更多。換言之至少於目前、於編程領域中，使用AI不一定係一個更有效率嘅方法。

當然，AI嘅能力繼續進化的話，的確能夠解決呢個問題。但同一時間，早前Apple及美國亞利桑那州立大學嘅研究都指出，目前AI使用嘅「思路鏈」（Chain of Thought, CoT）推理模式，其實無法處理複雜問題，一旦遇上超出其訓練內容嘅問題整個模型都會崩潰。換言之目前嘅AI其實係無真正嘅「推理」能力，而且好可能已經到達其能力上限。

至於「AI比真人便宜」呢件事，其實亦係一個假象。事關目前大部份AI公司都係以蝕本價吸引大家使用，而佢哋無可能一直蝕落去，換言之總有一日佢哋會大幅加價。AI開發者分析公司「DX」嘅副技術長Justin Reock亦指出，一個軟件工程師於工作上要用到多個不同嘅AI，而呢啲AI每一個都要錢，再考慮到企業嘅規模，哪怕AI月費真係小數都怕長計。《The Register》亦估計，於2026年要用AI做同一件事，成本可能會比依家貴10至15倍。用AI似乎唔一定能夠慳錢。

資料來源：The Register