小島工作室最近同科技公司Dnsys合作，推出以《Death Stranding 2: On the Beach》為主題嘅動力外骨骼，將遊戲入面嘅標誌性裝備帶到現實世界！

呢款限量版外骨骼全名為「Dnsys Z1 Exoskeleton Pro - DEATH STRANDING 2: ON THE BEACH Limited Edition」，由小島工作室藝術總監新川洋司同Dnsys團隊聯手設計，以 Dnsys自家Z1型號為基礎，融入《Death Stranding 2》世界觀嘅灰、橙、黑配色，再加上仿照遊戲中Sam外骨骼設計嘅燈光效果，用嚟顯示電池電量，科技感十足。

講到性能方面，呢款外骨骼唔只係「收藏級精品」，而係真真正正有實際用途嘅助力裝置。官方表示，外骨骼能分擔相當於體重200%嘅負荷，透過從膝蓋分擔壓力，有效減低關節磨損╴並聲稱著上後會即時感覺輕咗大約20公斤，幫助用家走得更高更遠。續航力方面可達4 時以上，並配備快拆式電池設計，方便隨時更換。

呢款限量版外骨骼將於12月2日正式發售，售價同數量將於當日公布。目前Dnsys嘅普通版本外骨骼「Dnsys Z1」定價約為1,500美元，估計聯乘版本嘅價位亦相近。