近年手提遊戲機再度興起，不少機迷都期待PlayStation可以加入戰團，推出一部能夠獨立運行遊戲嘅真正掌機。（嗰部PS Portal就…算啦）官方遲遲未有動作，最近就有外國機迷索性自己動手，成功將一部PS4 Slim改造成手提遊戲機，功能齊全之餘續航力更可達三小時。

This is a real PS4 Portable
byu/wewillmakeitnow inPs4portable

據外媒《VGC》報導，Reddit用戶Wewillmakeitnow花咗幾個月時間研發、測試同重新設計，成功將PS4 Slim底板徹底「瘦身」。佢透過切割同移除不必要嘅部分，大幅壓縮體積，同時重新整理電路佈局，以改善散熱同耗電表現。機身配備7吋OLED螢幕，支援1080p輸出，亦保留咗HDMI接口，可以隨時接駁電視，變返一部普通主機。值得一提嘅係，佢仲加入咗一塊ESP32微控制器，用嚟即時監測溫度同電量，一旦偵測到過熱情況，系統會自動斷電保護，確保部機運作安全又穩定。

對於手提機嚟講，散熱同續航力一向係大難題。Wewillmakeitnow採用耐熱 ABS 物料，透過 3D 打印製作機身外殼，同時重新設計散熱系統，包括風道同散熱片配置，再配合主動溫度管理，確保打大作都都唔會變成「煎蛋神器」。至於續航力方面，部機內置6粒6000mAh嘅21700電池，遊玩輕量至中度負載嘅Game，可以玩到2.7至3小時；即使運行高負載嘅 3A 大作，都可以撐到1.3至1.5小時，表現已經相當驚喜。

可惜嘅係，呢位大神表示呢部手提PS4純粹係個人興趣作品，並冇打算大量生產賣街。不過，呢個自製項目亦側面反映，如果一個機迷都可以做到呢個程度（雖然厚到成張顯示卡咁），Sony嘅研發部門絕對有能力做出一部更強勁、更輕薄嘅官方手提機。問題係只係，佢哋幾時先肯出手？