Valve早前宣佈會於今年第一季推出專為客廳電視打機而設，機身細小，但性能係手提機Steam Deck六倍嘅Steam Machine，以及頭戴式VR裝置Steam Frame，的確係引起唔少機迷期待。不過想入手嘅大家就要等多陣，事關Valve喺最新嘅官方Blog入面坦承，由於RAM及SSD價格喺過去三個月瘋狂上漲，搞到佢哋要「重新檢視」定價策略，推出日期由原定第一季延後到2026年上半年，具體時間同價錢仲未有公布。

根據《Eurogamer》報導，呢次延期主要係因為記憶體同儲存裝置嘅價格升得太誇張。以Steam Machine嘅基本配置16GB DDR5 RAM同512GB NVMe SSD為例，去年11月Valve宣布時，Amazon英國站嘅零售價分別係67英鎊同54英鎊，但去到今日已經分別飆升到148英鎊同88英鎊，足足貴咗一倍有多！如果係2TB容量嘅SSD，價格亦由129英鎊升到244英鎊。雖然Valve嘅採購價肯定唔會係街貨一樣價錢，但亦肯定會影響到成本及定價。

至於頭戴式VR裝置Steam Frame，則配備Snapdragon Series 8 Gen 3處理器、16GB LPDDR5X記憶體，仲有256GB或1TB SSD，所以面對嘅情況同Steam Machine類似。早前Valve曾表示希望Steam Frame可以賣得平過早年推出嘅Valve Index，即係919美金，依家睇黎就應該相當有難度。

Valve喺Blog入面表示，原本預計依家就可以公布具體價格同發售日期，但受到零件價格暴漲影響，需要多啲時間去重新規劃，所以將推出時間由「第一季」改為「上半年」。不過佢哋承諾會喺未來幾個星期陸續公布更多詳情，包括RAM/儲存嘅可擴充性、Valve Index嘅後續支援，以及Steam Machine嘅預期效能數據等等。對於急住想入手嘅玩家嚟講，呢次延期雖然失望，但起碼Valve夠坦白，冇強行推出一個定價離地嘅產品，都算係非常有誠意啦！

資料來源：Eurogamer