事隔三年，Sony今日終於正式發佈新一代旗艦級真無線耳機WF-1000XM6，號稱擁有全球最強降噪表現，通話質素亦係品牌史上最佳，同時機身體積進一步縮細，佩戴更加貼耳舒適。

據官方介紹，WF-1000XM6最強大嘅賣點就係佢嘅降噪表現，喺全新開發嘅高清降噪處理器QN3e及整合處理器V2加持下，今代嘅降噪能比前代XM5大幅提升25%，尤其係針對日常生活常見嘅中高頻噪音（例如隔離位大聲講電話、地鐵廣播）。而且每邊耳機更加碼到搭載4支收音咪（上代3支），全方位捕捉環境雜音，帶嚟更強更精準嘅降噪效果。

以前用藍牙耳機講電話，最怕比人話「你講野好似潛緊水」。今次Sony就喺兩邊耳機都加入骨傳導傳感器（Bone Conduction Sensor），並透過最先進AI波束成形降噪演算法，精準捕捉用家嘅聲音。就算身處大風或嘈雜環境，佢都可以智能分離你嘅人聲，令對方聽得清清楚楚，唔使再尷尬除低耳機用手機講。

音質方面，WF-1000XM6搭載咗Sony全新開發嘅8.4mm 驅動單元，其振膜採用「軟邊緣、硬圓頂」嘅獨特設計，柔軟邊緣帶來深沉且具包圍感嘅低頻，而輕巧又高剛性嘅圓頂則呈現出清晰通透嘅高頻。配合兩個強大處理器嘅協同運作下，帶嚟更高解析度（32-bit）同更豐富細膩嘅聲音表現。外型方面，今代耳機體積比上代縮細咗約11%，設計更貼合人耳內自然曲線，同時改用磨砂質感防滑塗層，確保配戴更加穩固舒適。

續航力方面，雖然體積細咗，但電量依然硬淨。開啟降噪下單次最高可聽8小時，配合充電盒總續航力長達24小時，而且支援無線充電。至於大家最關於嘅價錢，WF-1000XM6建議零售價為HK$2,599，提供黑及白銀兩款配色選擇，有興趣嘅朋友不妨去試聽一下啱唔啱心水。