等咗5年有多，Apple終於推出全新一代罩耳式耳機AirPods Max 2！雖然外觀同上代幾乎一樣，但內裡就換上更強大嘅H2晶片，主動消噪效果提升高達1.5倍，同時加入「適應性音訊」以及由Apple Intelligence驅動嘅「即時翻譯」等全新智能功能。

據官方介紹，AirPods Max 2最大特色在於升級咗H2晶片同埋全新運算音訊演算法，令「主動消噪」效果比上一代最高提升1.5倍，無論係搭飛機定地鐵通勤，都能更有效隔絕引擎聲等環境噪音，而「通透模式」亦變得更加自然，方便用方隨時留意周遭環境。音質方面，新機配備全新高動態範圍擴大器，中高頻聲音更加自然，低頻反應更準確。如果插埋附送嘅USB-C線連接，仲可以支援24-bit/48kHz無損音樂，對追求極致音質嘅玩家絕對係一大喜訊。

除咗音質同降噪升級，H2晶片亦為AirPods Max 2帶嚟多項智能功能。例如首度加入嘅「適應性音訊（Adaptive Audio）」，耳機可以因應環境自動微調降噪同通透模式程度；「對話感知（Conversation Awareness）」就會喺你開口講嘢時，自動調低音樂音量，同時降低背景噪音。另外亦加入咗一啲實用嘅操作，例如用家可以直接撳耳機上嘅數碼旋鈕（Digital Crown），遙控iPhone或iPad影相錄影。

講到最破格嘅，就係新機加入咗由Apple Intelligence驅動嘅「即時翻譯」功能，用家只要撳住聆聽模式按鈕，耳機就會將對話翻譯成你設定嘅語言，目前支援英文、法文、西班牙文、繁體中文、簡體中文、日文、韓文、等多種語言（暫未支援廣東話）。不過呢項功能需搭配iOS 26或以上版本、並已啟用Apple Intelligence嘅iPhone先能使用，即係iPhone 15 Pro或打後嘅型號。

至於電量方面，AirPods Max 2喺開啟主動消噪下可維持最長20小時聆聽時間，並終於順應潮流轉用USB-C接口。新機提供藍色、紫色、午夜暗色、星光色同橙色5款配色可選，定價依舊為HK$4,599，3月25日起接受訂購，預計下月初正式推出。