社交媒體成癮問題一直備受關注，而美國加州近日一宗裁決，隨時可能對整個產業帶嚟重大衝擊！Meta同Google旗下嘅YouTube，被指刻意設計令人上癮，導致一名年輕女用戶身心受創，陪審團最終裁定兩間公司敗訴，合共需賠償600萬美元。今次判決有機會引發骨牌效應，令各大科技巨頭面臨大量同類訴訟，甚至涉及數十億美元賠償。

綜合外媒報導，案件原告係一位名為Kaley嘅20歲女子。佢喺庭上表示，自己6歲開始用YouTube、9歲開始玩Instagram，其後逐漸深陷其中、無法自拔，結果導致10歲就患上抑鬱症並出現自殘傾向，13歲更被診斷出患有軀體變形障礙（Body dysmorphia disorder，又稱容貌焦慮）以及社交恐懼症。

Kaley嘅律師Mark Lanier喺結案陳詞直斥，呢啲平台猶如「特洛伊木馬」，表面睇落好玩又精彩，實際上隱藏住所謂嘅「成癮工程（engineering of addiction）」，利用無盡滑動（Infinite scroll）同影片自動播放等功能，完全控制咗青少年嘅生活。

經過長達七個星期嘅審訊同近9日嘅退庭商議，陪審團最終以10比2嘅大比數，裁定Meta同YouTube喺設計上存在疏忽，明知產品有危險但未有提供足夠警告。法院裁定兩間公司需向原告支付合共600萬美元嘅補償性及懲罰性賠償，當中Meta要承擔70%責任，而YouTube則承擔剩餘嘅30%。

對於裁決，Meta同YouTube雙雙表示不服並計劃上訴。Meta發言人強調，青少年心理健康問題非常複雜，唔可以單單歸咎於一個App；而YouTube發言人José Castañeda則表示，案件誤解咗YouTube嘅本質，強調佢哋只係一個負責任嘅影音串流平台，而唔係社交媒體網站。值得一提嘅係，該案原本亦有起訴埋Snap同TikTok，但兩間公司喺開審前已同原告達成咗保密和解協議。

今次裁決具有指標性意義，因為目前全美仲有超過1,500宗類似嘅訴訟排住隊等開審，牽涉超過350個家庭同250個校區。而喺今次洛杉磯判決嘅前一日，Meta先啱啱被新墨西哥州陪審團裁定，違反消費者保護法及未能保護兒童免受性掠奪者傷害，需罰款3.75億美元。唔知今次連環敗訴，會唔會迫使各大科技巨頭，徹底更改各大社交平台嘅設計同演算法呢，值得關注。