我愛啪啪啪打字機款藍芽鍵盤

文：MenClub 魏文青　　
POSTED ON 28 Sep 2015

謎面：「啪啪啪啪啪啪啪啪啪叮！」猜一樣辦公室用品。答案唔係靚女秘書小姐(??)，而係大家可能都冇用過嘅打字機！想當年文青仲係個未戒奶嘅屁孩，久唔久會去老豆做嘢嘅地方打躉，而為咗控制我唔好嘈住人做嘢，佢哋就會放一部半壞嘅老爺打字機畀我「啪啪啪啪啪」足一個下午。雖然當時文青盲字都唔識多個，但聽到嗰下「啪啪啪叮」就已經好興奮，文青甚至懷疑我依家咁鍾意「啪啪啪」就係因為當年積落嘅情意結…所以當我見到呢個由Qwerky Toy出嘅「Qwerky Writer」，我真係好興奮呀～～

呢個「Qwerky Writer」其實係一個藍芽鍵盤，但你睇佢個大細係13(闊) x 7(長) x 2.5吋(厚)，仲成三磅重，你就知佢同一般追求輕薄嘅藍芽鍵盤有好大分別。佢嘅賣點係完全模仿當年打字機鍵盤嘅設計而成，例如每個字母嘅鍵母會微微凹入，鍵軸亦用上全機械設計，真正好打又好聲，最特別就係左手邊嘅「Return Bar(中文真心唔知)」並唔係裝飾咁簡單，而係可以當Enter用，仲可以設定成最多5個字母嘅快捷鍵。

呢個鍵盤由2014年6月就開始喺Kickstarter上面集資，短短一個月內就集齊將近13萬美元正式研發，到近日正式宣佈第一批會於10月尾發貨。換言之最早收到嘅一批人係將近年半前就已經落咗Order！不過你依家想買就方便得多，只需329美金(約2550HKD)，仲有全球運送添！其實抵喎！
Qwerky Writter