今年5月時加拿大發明家Catalin Alexandru Duru，曾經利用自家發明嘅飄浮板喺距離湖面5米高空飛咗275.9米，打破咗用飄浮板嘅最長飛行距離世界紀錄。最近佢就為新型號進行測試，而且試飛超過分半鐘，同樣喺湖面進行試飛，飛行表現似乎比上次更加穩定，而且Duru控制飄浮板嘅技巧亦愈來愈成熟，有望下次試飛可以刷新紀錄。

今年31歲嘅Duru已經成立咗Omni Hoverboards公司，正為下一代飄浮板進行努力，佢話新型號用咗暫時唔可以公開嘅秘技改良過，而且已經申請緊專利添。其實Duru發明嘅飄浮板，睇落有少少似航拍機，不過就大部得多而且馬力亦足以乘載一個人企上去，睇片時見佢飛得好瀟灑，但諗到唔小心被螺旋槳割到，或者飛飛下反艇，應該都幾大鑊。