專門維修古董即影即有相機嘅MiNT，自從推出自家即影即有相之後就人氣追高企。日前MiNT就舉行產品發布會，宣布推出InstantFlex TL70 2.0。創辦人Gary Ho表示上年年底佢哋就去到德國嘅Rolleiflex舊廠取經，結果就將學到嘅技術用喺新出嘅TL70 2.0。為回應上代觀景器偏暗嘅意見，TL70 2.0就改菲涅耳透鏡製作觀景器，亮度比上一代高出5倍，望落仲好有立體感添。除此之外，TL70 2.0嘅放大鏡亦經過改良，面積增加32%，對焦同構圖時都可以更清楚。

創辦人Gary Ho係香港人，佢解釋「TL」代表雙鏡相機「Twin Lens」，而「70」代表即影即有機王「SX-70」。

TL70 2.0(左)嘅觀景器比上代TL70(右)光好多，而且亦冇咗中間個十字準星。

另一樣我覺得幾正幾改進，就係最短焦距離減至48cm，只係傳統雙鏡機嘅一半，以後唔使行遠啲先拍到。相機鏡頭下嘅轉盤可以揀f/5.6, f/8, f/16, f/22同f/bokeh呢5種光圈，f/bokeh仲可以拍到星形光圈。至於菲林都係用返Fujifilm Instax Mini，打開機背就可以成pack放入去，撳一張黑卡出嚟之後就可以慢慢影。

機身側邊有對焦轉盤同曝光補償掣，玩多重曝光時好有用。

新機操作就同以前一樣，撳一下紅色快門掣就影到，不過就唔係即時彈張相出嚟，要再撳另一個掣先會開始print，咁樣有乜好？咁就可以用一張菲林影幾次，玩埋多重曝光都得。另一個玩法就幫人影完之後，等佢自己撳張相出嚟，好有抽卡feel，都幾好玩，呢種驚喜亦係玩菲林吸引人嘅地方。

TL70 2.0都係用返Fujifilm Instax Mini相紙。

今次TL70 2.0亦連埋唔少配件一齊出，專用皮套($1,590)同相機帶($480)都係由日本製造，精緻得來亦令相機更有復古味道。另外仲有遮光罩同幾款鏡頭，分別有ND 2/4/8減光濾鏡同埋Close up近攝濾鏡，輕輕扭喺鏡頭前就可以用到唔同效果，一套配件售價係$890。

除TL70 2.0之外，同場仲有SLR670-S登場。SLR670-S係繼SLR670α同SLR670m之後，成為「670系列」第三部作品。SLR670-S外型仍然經典寶麗來SX70為原型，不過就轉用銀黑色配搭。新一代最特別就係Time Machine設計，轉盤上有由1/2000到B快門一共16種快門選擇，而且仲多咗A100同A600呢兩個自動模式，唔使額外filter都可以玩到ISO 600同ISO 100相紙，要讚。

InstantFlex TL70 2.0 ($2,990)
SLR670-S ($5,190)

MiNT Store‧2720 0222