1. 你被伴侶完全操控

愛情把兩個人拉在一起，顧及對方嘅感受係絕對需要嘅事，即係你都唔會想對方同前度單方面約會吧？但請唔好忘記你哋始終係兩個「個體」，理應有時間做你自己想做嘅事，得到屬於自己嘅時間，但若果你每次提出自己想做嘅事，對方都以憤怒、質疑、妒忌來應對，毫無理由(或不合理地)限制你嘅自由，以要脅等方式令你聽從佢嘅意見(或命令)，係相當惡劣嘅相處模式。

2. 阻止你尋求成長

年齡嘅成長冇人阻到你，但除此之外，每個人每日都學習緊嘅新嘢，心理、智慧層面上總會有所進步，而每個人亦應該要追求成為更好嘅自己，作為伴侶亦應支持對方尋求進步。問題係有啲伴侶或者出於自卑、妒忌、不安，會將你嘅成長視作威脅而選擇成為你成長嘅絆腳石，阻止你成為更好嘅人。可能你想學新嘅語言，但佢就單單打打冷言冷語，目的或者係「鎖」住你喺身邊。

3. 媒氣燈操縱(Gaslighting)

OK，要學生字啦。「Gasligting」來自1938年一部名為《Gaslight》嘅劇本，及後改編成同名電影，由於劇情關係，於60年代演變成心理學用語，簡單啲黎講就即係「委過於你」，透過隱瞞、竄改、謊言令你質疑記憶或現實，搞到連你都質疑自己係咪真係做錯事。。例如當你希望了解佢嘅行程，佢就話你想監控佢；你見到佢喺社交網站上同人調情，佢就話你善妒、唔信佢。有別於與你溝通、解釋、協商，有毒嘅情人用Gaslighting嘅方法直接「解決」提出問題嘅你。

4. 你得不到尊重

要注意呢到講嘅唔係由下以上嘅「尊敬」，而係人與人應該要有嘅「尊重」。例如你提出任何意見，佢未聽完就覺得你係廢嘅；你做任何事佢都覺得唔順眼而以謾罵或嘲諷回應。缺乏尊重會令你自我形象低落，逐漸就唔敢再提出任何意見，於是兩個人之間嘅問題就無法解決。

5. 以性作要脅

或者係男人最能夠感受到嘅特徵，言簡意賅地講就係「春袋被人捏住咗」。當然，每個人都有自由去決定進行親蜜行為與否，作為伴侶亦應該要尊重對方意願，但若果你嘅伴侶以性為要脅以達到目的，例如要求買某份禮物，唔買就唔畀搞，咁呢場性愛嚴格上就係一場交易，「性」亦成為對方控制你嘅工具。

6. 你不能表達自己

準確啲黎講，呢個特徵係其他特徵嘅結果。當你被控制、被貶低，提出意見亦會被駁回甚至惹來懲罰，久而久之你就會無法表達自己嘅意見同感受。而又由於只有佢講無你講，關係亦變成你單方面遷就佢嘅不平等條約。某程度上你同個俘虜係差唔多嘅。

7. 對方拒絕妥協

個人認為其實係以上一切嘅根源。某啲人因為各種原因(可能係自己中心、可能係自卑、可能係錯誤嘅價值觀)，覺得無需要或不可以向伴侶妥協，一切必須以佢嘅意願為依歸，任何商量討論都係不應存在。但其實兩個個體就算再合拍，總會有意見不合嘅情況，我想食M記，你想食炸雞，其必然結果就係討論以及互相妥協，得出一個大家都滿意嘅決定。如果決定只係對其中一方有利，而完全漠視另一方嘅感受，咁就唔係妥協，係威脅。

8. 你身邊嘅人唔鍾意佢

係，愛情係兩個人嘅事，旁人嘅閒言閒語唔需要亦唔應該影響你哋嘅感情，但若果好多你信任嘅親朋戚友都覺得你呢段關係有問題，咁你或者就應該認真審視一下係咪出咗咩問題。